Qarabağın dağlıq hissəsində müvəqqəti yerləşdirilmiş Rusiya sülhməramlılarının nəzarət zonasında öz mövcudluğunu hələ də saxlayan qondarma rejim və onun tör-töküntüdən ibarət olan “Artsax Müdafiə Ordusu” artıq sonun başlanğıcına yaxın yeni çıxış yolları axtarmağa çalışır.
Belə ki, separatçı qurumun üzvlərindən olan Artur Arutyunyan “Azatutyun”la söhbətində bu barədə sərsəm fikirlər səsləndirib.
Arutyunyana görə, əgər Rusiya sülhməramlıları bütün təmas xətti boyunca yerləşdirilsə, Qarabağdakı erməni separatçılar “müdafiə ordusunu” “özünümüdafiə birlikləri” ilə əvəz edə bilərlər.
Məsələyə şərh verən politoloq Nadir Şəfiyev Yenisabah.az-la söhbətində məlum bəyanatdan söz açaraq deyib ki, təbii olaraq Azərbaycan həmin ərazilərdə “özünümüdafiə birlikləri”nin mövcudluğu ilə razılaşa bilməz:
“Çünki bu, Azərbaycanın suverenliyini həmin ərazilərdə pozur”.
N. Şəfiyevin sözlərinə görə, biz həmişə görmüşük ki, ermənilərə qıraqdan dəstək verənlər onların “fətva”sını verəndən sonra bədnam qonşularımız belə absurd bəyanatlarla çıxış edirlər:
“Hazırda da qonşularımızdan bəlkə də bir neçəsinin maşa olaraq bölgəni qurdalamağını müşahidə edirik. Buna görə də ermənilər belə bəyanatlar verir.
Üçüncüsü isə tarix boyu bu millətin nümayəndələri və siyasətçiləri vaxtaşırı “qaşınıblar” və zorla öz buynuzlarını çobanın çomağına sürtüblər”.
Analitik iddia edib ki, biz 2020-ci ildə hərbi əməliyyatları dayandırıb onlara fürsət verdik, lakin ermənilər bunu qanmadılar:
“Mən belə başa düşürəm. Hər şey onu göstərir ki, deyəsən, yaxın gələcəkdə növbəti əməliyyat keçirilməlidir ki, onların ağlı başına gəlsin. Amma bu əməliyyatın da keçirilməsində müəyyən beynəlxalq tələblər və meyarlar var ki, onları razılaşdırıb, sonra bunu həyata keçirməliyik. Çox güman ki, ölkə başçısı da qeyri-rəsmi şəkildə bunu həyata keçirməyə çalışır və o danışıqlar gedir”.
Rafi MÜSLÜMOV